အပိုင်း ၂။ ပညာလို အိုသည်မရှိ
ကဲ အရင်တစ်ခေါက်က ကိုယ် အင်တာနက်ပေါ်မှာ ဖတ်နေတဲ့ အကြောင်းအရာတစ်ခုရဲ့ အရည်အသွေးနဲ့ ယုံကြည်နိုင်မှုကို ခွဲခြမ်းစိတ်ဖြာပုံကို ပြောပြခဲ့တယ်နော်။ အခုတစ်ခါမှာတော့ ပေါ်ဦးသိသလောက် အင်တာနက်ပေါ်က ကောင်းရာကောင်းနိုး စာပေကျမ်းဂန်လေလာလို့ရတဲ့ နာမည်ကျော် နေရာလေးတွေပြောပြမယ်ကွယ်။
၁။ Wikipedia / ဝီကီပီးဒီးယား
လူသိများကြတဲ့ ဝီကီပီးဒီးယား ဆိုတာက အင်တာနက်ပေါ်က စာပေကျမ်းဂန်လေ့လာတဲ့ သူတွေ စုပေါင်းဝိုင်းဖွဲ့ပြီးရေးထားတဲ့ အွန်လိုင်း စွယ်စုံကျမ်းပါ။ တစ်ကမ္ဘာလုံးအတိုင်းအတာနဲ့ လူသန်းပေါင်းများစွာ လုပ်အားပေး ဝင်ရောက်ရေးသားထားလို့ ရေးတဲ့သူရှိရင်ရှိသလို ရေးထားတဲ့ ဘာသာစကားပေါင်းရာကျော် ဖတ်ရှုလို့ရပေမဲ့ အင်္ဂလိပ်ဘာသာစကားနဲ့ ရေးထားတဲ့ ဆောင်းပါးတွေကတော့ အများဆုံးပေါ့။ မောင်မယ်တို့ မြန်မာယူနီကုတ် အသုံးပြုမယ်ဆိုရင်တော့ မြန်မာလိုလည်း ဖတ်လို့ရပါတယ်။ ဘယ်သူမဆို ဝင်ရေးလို့ရတယ်ဆိုတော့ လူဆိုတာ တခါတလေ အမှားလည်း လုပ်မိတတ်ကြတာက သဘာဝပဲမို့ သူ့ရဲ့ ဆောင်းပါးတိုင်းကို ၁၀၀ ရာခိုင်းနှုန်း တစ်ထစ်ချ ယုံကြည်လို့ မရဘူးဆိုပေမဲ့ အထွေထွေ ကိုးကားမှီငြမ်းဖို့တော့ အလွန်အသုံးဝင်ပါတယ်။
၂။ Youtube
Youtube ကတော့ လူတိုင်းက သူတို့ပြုလုပ်ထားတဲ့ ဗီဒီယိုတွေကို လူတိုင်းမြင်နိုင်အောင် ဝေမျှနိုင်တဲ့ အွန်လိုင်း စင်္ကြန်တစ်ခုပေါ့။ ပေါ်ဦးပြောထားပြီးသလိုပဲ ဘယ်သူမဆို ဗီဒီယိုတွေကို ဝေမျှလို့ရတယ်ဆိုတော့ အကျိုးမရှိ အချိန်ကုန်စေမယ့် အကြောင်းအရာတွေ လုပ်တင်ထားတာရှိနိုင်တယ်ဆိုပေမယ့် ကိုယ်ရှာတတ်ရင်ရှာနိုင်သလို အကျိုးရှိတဲ့ ဗီဒီယိုတွေ သန်းပေါင်းများစွာရှိပါတယ်။ Youtube ကိုယ်တိုင်ကတော့ လူ့အဖွဲ့အစည်းကို ထိခိုက်စေမယ့်အရာတွေနဲ့ ကလေးသူငယ်တွေနဲ့ မသင့်တော်တဲ့ အရာတွေကိုတော့ သူ့ စင်္ကြန်ပေါ်မှာ လက်မခံပါဘူး။ ဘာပဲပြောပြောလေ ဘယ်ဟာကိုမှ မယုံခင် စဉ်းစားတွေးတော ပြီးမှ ယုံပါလေ ကွယ်ရို့။
၃။ Pinterest
ဖတ်စရာ၊ အသုံးကျစရာ၊ စိတ်ဝင်စားစရာ စာတိုစာစုလေးတွေကို ဓာတ်ပုံတွေ ဒီဇိုင်းလေးတွေနဲ့ လှလှပပ အချင်းချင်း ဝေမျှလို့ရတဲ့ နေရာတစ်ခုပါ။ ကိုယ်စိတ်ဝင်စားတဲ့ ဘယ်အကြောင်းအရာမဆို ရှာတတ်ရှာတတ်သလို အသုံးဝင်တာပေါ့။ သူ့ကို Youtube လိုပါပဲလို့ ပြောချင်ပါတယ်။ သူလိုကိုယ်လို လူတိုင်း ပြန်လည်ဝေမျှနိုင်တာမို့ ဘယ်ဟာကိုမှ မယုံခင် စဉ်းစားတွေးတော ပြီးမှ ယုံကြပါနော်။ Pinterest မှာ Website လည်းရှိသလို App လည်းရှိပါတယ်။
၄။ Khan Academy
သူကတော့ ကျောင်းဘာသာရပ် သင်ခန်းစာတွေကို ဗီဒီယိုပြုလုပ်ထားတဲ့ ပညာရေး website တစ်ခုပါ။ နိုင်ငံတကာ ပညာရေး သင်ရိုးညွန်းတမ်းတွေကို အခြေခံပြုလုပ်ထားတဲ့ သင်တန်းစာတွေဆိုပေမဲ့ မြန်မာဘာသာပြန်ထားပြီးတဲ့ ဗီဒီယိုတွေဆိုရင် မြန်မာစာတမ်းထိုးတွေကို unicode font နဲ့ ဖတ်လို့ရပါတယ်။
၅။ Ted
ကမ္ဘာတစ်ဝှမ်းက ပညာရှင်တွေက သူတို့ အိုင်ဒီယာတွေ၊ လေ့လာတွေ့ရှိချက်တွေ၊ အသိပညာတွေကို အများပြည်သူကို ပြန်လည်ဝေမျှဖို့ ပြုလုပ်တဲ တင်ဆက်ပွဲတွေက ဗီဒီယိုတွေကို ပြန်လည်ဝေမျှထားတာပါ။ အင်္ဂလိပ်အများဆုံးဖြစ်ပေမယ့် တချို့ဗီဒီယိုတွေက မြန်မာစာတမ်းထိုးရှိတယ်ဆိုရင် unicode font နဲ့ ဖတ်လို့ရပါတယ်။
Ted-ed ကတော့ Ted က ပြုလုပ်ထားတဲ့ ၅ မိနစ်စာ အထွေထွေ ဗဟုသုတ ပညာပေး ဗီဒီယိုတွေ စုဆောင်းမှုပါ။
၆။ Memrise
အင်္ဂလိပ်စာ အပါအဝင် ဘာသာစကားပေါင်း ၅၀ နီးပါးက ကို အွန်လိုင်းတစ်ဆင့် လေ့လာ ဝေါဟာရတွေကို အလကားလေ့လာ လေ့ကျင့်လို့ရတဲ့ နေရာတစ်ခုပါ။ အသုံးပြုသူတွေကပဲ ပြန်ဖန်တီးပေးတဲ့ သင်ခန်းစာတွေပါ။ Memrise မှာ Website လည်းရှိသလို App လည်းရှိပါတယ်။
၇။ Code Academy
ကွန်ပျူတာ programme နဲ့ ပက်သက်ပြီး လေ့လာလို့ရတဲ့ သင်ခန်းစာတွေပေးထားတဲ့ နေရာပါ။
၈။ Open Development Myanmar
မြန်မာနိုင်ငံနဲ့ ပက်သက်တဲ့ အသုံးဝင်တဲ့ data အချက်အလက်တွေကို တစ်နေရာတည်းမှာ စုဆောင်းထားပြီး ရှာဖွေလို့ရတဲ့ နေရာတစ်ခုဖြစ်ပါတယ်။
၉။ Open Hluttaw
လွတ်တော်အတွင်းက ကိုယ့်လွှတ်တော်ကိုယ်စားလှယ် ဘယ်သူလဲဆိုတာနဲ့ သူတို့ရဲ့ အချက်အလက်တွေကို စုံစမ်းရှာဖွေလို့ရပြီး သူတို့နဲ့ ဆက်သွယ်ပြောဆိုနိုင်မယ့် နည်းလမ်းတွေလည်း ရှိဖွေလို့ရပါတယ်။ Open Hluttaw မှာ Website လည်းရှိသလို App လည်းရှိပါတယ်။
