အပိုင်း ၇။ လာသမျှလူတိုင်းကို မျက်စိမှိတ် လက်မခံမိမှ တန်ကာကျမည်

ဇီးကွက်ရေ… ငါတောင် ဒီကွန်ရက်လောကမှာ ကျင်လည်လာတာ ဒီလောက် နှစ်ပေါင်းကြာနေပြီး နင့်လောက် မိတ်ဆွေမများဘူး။ နင်ဘယ်လိုများ လူတွေအများကြီးနဲ့ သိသွားရတာပါလိမ့်။

အင်တာနက်ပေါ်မှာ လူတွေက လူမှုကွန်ရက်ကိုသုံးကြတာ ရည်ရွယ်ချက်အမျိုးမျိုးရှိကြတယ်။ တစ်ချို့က ကိုယ့်ကိုယ့်ကို ကိုယ့်မိတ်ဆွေရင်းတွေနဲ့သာ ချိတ်ဆက်ပြီး နားအေးပါးအေး နေတတ်ကြတဲ့ သဘောရှိပေတယ်၊ တချို့ကတော့ ကိုယ့်ကိုယ်ကို ခြွေရံပေါင်းသင်းများနဲ့ ဝန်းရံနေတာကို သဘောတွေ့ မနော့ခွေ့တတ်ကြတယ်။ ဒါနဲ့ပက်သက်လို့ ဘယ်သူမှ အပြစ်မရှိဘူး။ လူဒိုင်းလူဒိုင်း၊ အဲ့ဟုတ်ပါဝူး မှားလို့၊ လူတိုင်းလူတိုင်းက ကိုယ့်အကြိုက်နဲ့ကိုယ်ပါ။

အဲ့ဒီတော့ ကိုယ်က တစ်ခါတစ်ရံ ကိုယ်မသိတဲ့သူတွေနဲ့ လူမှုကွန်ရက်ပေါ်မှာ မိတ်ဆွေဖွဲ့တော့မယ်ဆိုရင် ဆင်ခြင်ရမယ့် အချက်လေးတွေကို နှလုံးသွင်းထားရင် ဒုက္ခမရောက်ဘူးပေါ့ကွာ။ တစ်ခါတစ်လေ ကိုယ်က သူနဲ့ ပက်သက်ပြီး တစ်ခုခု သိနေတယ်လို့ ထင်မိတာမျိုး၊ မြင်ဖူးသလိုလို ထင်တာမျိုးနဲ့ ကိုယ်နဲ့အပြင်မှာ တကယ် မသိတဲ့သူတွေနဲ့ အမှတ်မထင် လူမှုကွန်ရက်ပေါ်မှာ မိတ်ဆွေဖြစ်သွားတတ်ကြတာမျိုးတွေ ရှိတယ်လေ။ အပြင်မှာ ကိုယ်က သူ့ကို မမြင်ဖူးရင်တောင်မှ အွန်လိုင်းပေါ်မှာ သူဘယ်သူဆိုတာ သေသေချာချာ သိနေရင် ကိစ္စအများကြီး မရှိပါဘူးလေ။​ တစ်ခါတစ်လေဆိုရင်တောင် ကိုယ်နဲ့သူ့ကြားက မိတ်ဆွေတူ (mutual friends) မရှိဘဲနဲ့ မိတ်ဆွေဖြစ်သွားကြတယ်ဆိုတာ သတိလေးတော့ပြုပါ။

တစ်ခါတစ်လေ အကောင့်တုတွေကိုလည်း သတိထားပါ။ အကောင့်တုတွေဆိုတာကတော့ အရင်တစ်ခေါက်က ပြောသလို ကိုယ်နဲ့လည်း အပြင်မှာ သေချာမရင်းနှီး၊ လူမှုကွန်ရက်ပေါ်မှာပဲ သူငယ်ချင်းစာရင်းထဲ ရောက်နေပြီး ဘယ်သူဘယ်ဝါမှန်း မသိရတဲ့ အကောင့်မျိုးတွေကို ပြောတာပါ။ ဘာပဲဖြစ်ဖြစ်လေ အွန်လိုင်းပေါ်မှာ အလုံခြုံဆုံးအပြုအမူကတော့ ဘယ်သူကပဲ ကိုယ့်ကို မိတ်ဆွေလာဖွဲ့ချင်တယ်ပြောပြော လာသမျှလူတိုင်းကို မျက်စိမှိတ် လက်မခံမိမှ လုံခြုံမယ်လေ။ အဲ့တော့ ဒီလူ့ကို လက်ခံသင့်၊ မခံသင့်ကို ကြိမ်ဖန်တစ်လဲလဲ စဉ်းစားဆင်ခြင်ပြီးမှ မိတ်ဆွေဖြစ်တာဆိုတာက ပညာရှိတို့ လုပ်ထုံးလုပ်နည်းပဲကွဲ့။