အပိုင်း ၂။ လူမှုကွန်ရက်ခေတ်ဆိုတော့လည်း
ဪ… အကျွန်ုပ်တို့ခေတ်ကလို မဟုတ်တော့ပဲ အခုက လူမှုကွန်ယက်ဆိုတာတွေကို တမ်းတမ်းစွဲစွဲနေကြတဲ့ ကာလပါလား။ လူတွေက အိပ်ရာထရင်လည်း ဆိုရှယ်မီဒီယာပေါ်တင်ရ၊ အိမ်သာထဲရောက်နေရင်လည်း တင်။ ဘယ်ရောက်ရောက် ဘယ်ပေါက်ပေါက် အားလုံးသိအောင် အကြောင်းကြားရ၊ ကိုယ်ငိုငိုရယ်ရယ် သူငယ်ချင်းတွေအားလုံးလည်း မလွတ်လိုက်စေရ ဆိုတော့၊ အိုး… အရမ်းကို ဆိုရှယ်ကျနေတဲ့ ခေတ်ပါလား ကွယ်ရို့။
ဒါနဲ့ မောင်မယ်တို့ ကိုယ့်အကြောင်းအရာအတွေ အကုန်လုံးကို ထုတ်ဖော်ပြောကြားနေတဲ့ ဆိုရှယ်မီဒီယာတွေဆိုတာ ဘယ်လိုအလုပ်လုပ်သလဲဆိုတာ သိပါသလား။ အင်တာနက်ပေါ် တက်ပြီး လူတွေနဲ့ ပေါင်းသင်းဆက်ဆံတာတွေလုပ်ကြမယ်ဆိုရင် အနည်းဆုံးတော့ ဒီဆိုရှယ်မီဒီယာတွေပေါ်မှာ ဘေးကင်းပြီး စမတ်ကျအောင် ဘယ်လိုနေထိုင်ရမလဲဆို လေ့လာထားသင့်တယ်နော်။
ဇီးကွက်သိတဲ့အတိုင်း အခု မြန်မာပြည်ကြီးအတွက် နာမည်အကြီးဆုံး ဆိုရှယ်မီဒီယာကတော့ Facebook (ဖေ့စ်ဘုတ်ခ်) ပေါ့။
ဒါပေမယ့် တစ်ခါတစ်လေ… ဇီးကွက်ရယ်… အဲ့ဒီ ဖေ့စ်ဘုတ်ကြီးကတစ်ဆင့် ကိုယ်တကယ် အပြင်မှာ သိတဲ့သူတွေကကော၊ အပြင်မှာ မမြင်ဖူးသေးတဲ့သူနဲ့ပါ ကိုယ်က ချိတ်ဆက်မိလာတဲ့အခါ ကိုယ့်ရဲ့ ကွန်ရက် ကျယ်ပြန့်လာတော့တာပေါ့။ အဲ့ဒီအပြင် ဒီကွန်ရက်ရဲ့ စင်္ကြန်ပေါ်မှာ အသင်တို့ ကိုယ်တိုင်ဖန်တီးထားတဲ့ အကြောင်းအရာတွေကို လူအများမြင်အောင် ဝေမျှလို့ရသလို သူများတွေ လုပ်ထားတာကိုလည်း ရှာဖွေကြည့်လို့ရတာပေါ့။ သတင်းအချက်အလက်၊ ဗဟုသုတ၊ အနုပညာ၊ ကြော်ငြာ စတဲ့ အကြောင်းအရာအစုံကို တွေ့နိုင်တယ်လေ။ လူတကာ ဘယ်သူမဆို လုပ်နိုင်တော့ ဗြောက်သောက်တွေလည်း ရှိနိုင်တာပေါ့။
တစ်ခါတလေကျရင် Facebook တို့ Twitter တို့လို လူမှုကွန်ရက်တွေမှာ ကိုယ်က ခွင့်ပြုထားရင် ကိုယ်လုပ်သမျှ အရာတွေအားလုံးကို လူတကာ မြင်နိုင်တယ်လေ။ အပြင်လောကနဲ့ နှိုင်းယှဉ်ပြောရရင် ကိုယ်က လူလယ်ခေါင်မှာ ကိုယ့်ကိုယ်ကို ထွက်ပြနေသလိုမျိုးပေါ့။ အဲ့ဒါနဲ့ပက်သက်ပြီးတော့ ကိုယ်ရေးကိုယ်တာ အချက်အလက်လုံခြုံရေးအကြောင်းကို ကျွန်ုပ်ပေါ်ဦးက အကျယ်တဝင့် ရှင်းပြချင်ကြောင်းပါ။
