အပိုင်း ၁၃။ စကားဝှက်တမ်း ကစားကြရာဝှယ်
မောင်မယ်တို့ရေ အခုနတုန်းက ကိုယ့်ရဲ့ စကားဝှက်တွေက အိမ်သော့တွေလိုပဲ အရမ်းအရေးပါတယ်လို့ ပြောခဲ့တယ်နော်။ အခုတစ်ခေါက်တော့ အဲ့သော့တွေ ခိုင်ခံလုံခြုံအောင်ဘယ်လိုရမလဲဆိုတာကို ဆက်ပြောပြမယ်။
အွန်လိုင်းက Facebook တို့ Google တို့လို နေရာတွေက စကားဝှက် နဲ့ ပတ်သက်တဲ့ သတိပေးချက်တွေကို မကြာခဏ မြင်ဖူးကြားဖူးကြလိမ့်မယ်လို့ ထင်ပါတယ်။ အက္ခရာတွေ သုံးဖို့နဲ့ စာလုံးအကြီးအသေးတွေ သုံးကြဖို့ ၊ စာလုံးအရေအတွက်များများသုံးကြဖို့နဲ့ စာလုံးတွေကို အစီအစဥ်လိုက် မသုံးကြဖို့ (ဥပမာ abcd၊ 1234) ဆိုတဲ့ သတိပေးချက်တွေကို မကြာခဏ မောင်မယ်တို့ မြင်တွေ့နေကြမှာပါ။
Password ကောင်းကောင်းတစ်ခုဟာ ခပ်ရှည်ရှည်ဖြစ်သင့်ပြီး သူများတွေ အလွယ်တကူ မှန်းနိုင်တဲ့ အရာတွေ (ဥပမာ မိမိနာမည်၊ မိမိဖုန်းနံပါတ်၊ မိမိချစ်သူနာမည်၊ မိဘမောင်နှမနာမည်၊ မိမိအချစ်တော် ခွေးလေးကြောင်လေးတွေနာမည်၊ မိမိမွေးနေ့မွေးရက်၊ username အတိုင်းပဲ ကို စကားဝှက်မှာလည်း အတူတူပြန်ပေးတာမျိုးတွေ၊ ဂဏန်းတွေကို အစဉ်လိုက် 1234 ပေးတာမျိုး)
တွေမလုပ်ဖို့အရေးကြီးပါတယ်။ ဒါဆိုရင် ကိုယ့်အကောင့်ထဲကို ဖောက်ဝင်ချင်သူက အဲ့ဒါကို မှန်းပြီး ကိုယ့်စကားဝှက်ကို သိသွားရင် မကောင်းပါဘူး။
မောင်မယ်တို့အနေနဲ့ အကောင့်တွေများလာတဲ့အခါ တစ်ခုချင်းစီကို သီးသန့်ထားရတာ မှန်းရခက်အောင် ထားရတာမို့ မှတ်မိဖို့မလွယ်ဘူးဆိုတာတော့ နားလည်ပါတယ်။ ဒါပေမဲ့ အဲ့လိုဖြစ်မှပဲ ကိုယ့်အတွက် ဘေးကင်းလုံခြုံမှာမို့ လုံ့လဝီရိယ စိုက်ကြပါလို့ ပေါ်ဦးကတိုက်တွန်းချင်တယ်။
ကောင်းမွန်ပြီး သူများမှန်းဆရ ခက်တဲ့ စကားဝှက်တွေဆိုတာက ကျပန်းစကားလုံးတွေ အက္ခရာအကြီးအသေးတွေ ဂဏန်းတွေကို ရောနှောပြီးထားတာမျိုးဖြစ်သင့်တယ် (ဥပမာ KweePAWOOlivesINshweBo46)။ စကားဝှက်ကို စကားစုအနေနဲ့ ကျပန်းစကားလုံးသုံးလုံးနဲ့အထက် တွဲပြီး ပေးတာမျိုး (ဥပမာ – RiverCountryShoesPowerSocket)၊ နောက်တစ်နည်းက စာကြောင်းတစ်ခုအနေနဲ့ ပေးတာမျိုး (ဥပမာ – Iwenttothemarkettoday/ Iw3nt2th3m@RKET2day) စတာတွေကတော့ ပိုပြီးအားကောင်းစေပါတယ်။ ရိုးရိုး ထားနေကျ (နာမည်တွေ၊မွေးနေ့တွေ) ပါနေတဲ့ Password ထက်စာရင်တော့ ပိုကောင်းသွားတာပေါ့။
ကဲ…မောင်မယ်တို့ရေ မိမိတို့ အကောင့်တွေရဲ့ Password တွေကို သေချာပြန်စစ်ဆေးပြီး ပိုပြီးလုံခြုံတဲ့ Password ကောင်းကောင်းတစ်ခုနဲ့ သော့ခတ်ကြရအောင်နော်။